Anger Management

Big Bag ရဲ့ Anger management album ကို နားထောင်ဖြစ်တယ်။ Album Cover မှာကိုပဲ Rating သတ်မှတ်ချက် ကို 18+ ဆိုပြီး ထည့်ပေးထားတယ်။ ဒါက ကိုယ်တွေ နိုင်ငံမှာ မြင်နေကျမှ မဟုတ်တာ။

ဟို ဖောင်းထုတဲ့ သီချင်း FMWO ကတော့ တော်တော် ဂယက် ရိုက်သွားတာပေါ့။ ရယ်စရာကတော့ audio CD မှာ ဆင်ဆာ မဖြတ်တော့ ဆဲတဲ့ စကားလုံးတွေ ပါလာပြီး Live show မှာ FMWO ကို ဆိုတော့ ဆဲတဲ့ စာသားတွေကို ဆင်ဆာဖြတ်ထားတယ်။

ထွက်ခါစကတော့ Starry Night တို့ ဘာတို့ကတော့ အတော် hot ဖြစ်ခဲ့တာပေါ့။ ကောင်းလည်း ကောင်းပါတယ်။ သတိရတယ် သီချင်းကလည်း အတော်ကောင်းတယ်။ သတိရတယ် MV ကို Pencil Animation Studio ကနေ ဆွဲ လိုက်တော့လည်း ထပ်ပြီး ပေါက်သွားပြန်ရော။ 

သတိရတယ် သီချင်းက သူဆိုနေကျပုံစံ မဟုတ်ပဲ EDM ပုံစံနဲ့ သီချင်း tempo လေးက တက်သွားတာ။ နောက်ဆုံး Solo တွေ ဝင်တဲ့နေရာဆို Live show မှာ လုံးဝ အလွင့်ဖြစ်ပြီး ပေါက်ကွဲထွက်လို့ ရတာမျိုး။

အဲ့ထဲကမှ နောက်ဆုံးအပုဒ် Running Away သီချင်းကို ကိုကျားပေါက် ဘယ်လို ခံစားချက်နဲ့ ရေးခဲ့လဲ အတော်စိတ်ဝင်စားဖို့ ကောင်းတယ်။ဒီ  album title ကိုက Anger Management ဆိုတော့ သူဖြစ်နေတဲ့ စိတ်ပိုင်းဆိုင်ရာ ပြဿနာတွေ ကို ဒီသီချင်းခွေထဲမှာ မြင်ရမှာပေါ့။ ဒီ album ထွက်ပြီး သိပ်မကြာဘူး သူအိမ်ထောင် ကွဲ သွားတယ်။ ဒါဆို ဒီသီချင်းက မကွဲခင်မှာ သူဖြစ်နေတာတွေကို သူ ထုတ်ပြောထားတာလို့ ကျွန်တော် ထင်တယ်။ အဲ့အချိန်မှာပဲ ဘာလို့ ဒီ အခွေက 18+ rating လို့ သူသတ်မှတ်ထားတာလဲ ဆိုတာ ကျွန်တော် နည်းနည်း နားလည်လာတယ်။ ဒီသီချင်းကို နားထောင် စ အချိန်တုန်းက ဘာမှ မသိခဲ့ပေမယ့် ကျွန်တော့် အသက် ၃၅ ရောက်တဲ့ အချိန်မှာတော့ ဝါးတားတား တော့ နားလည် လာပြန်တယ်။ Album rating ကို 18+ မလုပ်ပဲ 30+ လုပ်ရမှာ တကယ်က။

 Running Away သီချင်းကို သူရေးခဲ့တဲ့ အချိန်မှာ ဘယ်လောက်တောင် ခံစားနေရမလဲ မသိဘူး။ သီချင်းက နားထောင်ရတာနဲ့တင် အတော် ကို မွန်းကြပ်နေတယ်။ 

"တစ်အိမ်တည်းနေပြီး မမြင်ရအောင် ပုန်းရှောင်ရင်း မောနေပါပြီ" 

သူဘယ်လောက်တောင် ခံစားနေရလဲ ဆိုတာ သီချင်းစတာနဲ့တင် စပြီး ခံစားလို့ ရတယ်။ 

သူ့ကို မပြောနဲ့။ တစ်အိမ်တည်း မနေတဲ့ ကိုယ်တောင် တခါတလေ ပုန်းရှောင်နေရတာ အတော်ခံရခက်တယ်။

"ဒါအိမ်ထောင်ရေး ပုစ္ဆာ" လို့ ဆိုလိုက်တာကို အစက ဘာပြောချင်မှန်းမသိ။ ကနေ့ကျမှ ငယ်ငယ်က သင်္ချာပုစ္ဆာ ဆိုတာက ပြဿနာလို့ တွေးမိလိုက်လို့ သူ ဘာကို ဆို လိုက်မှန်းသိသွားတာ။ 

ကိုယ်တွေလည်း အိမ်ထောင်ရေးနဲ့ ပတ်သတ်ပြီး ဘယ်လို လာမယ် မသိဘူး။ အသက်ကြီးလာလေ အိမ်ထောင်ပြုဖို့ နီးလာလေ အိမ်ထောင်ပြုဖို့ တွေဝေ လာလေ ဖြစ်နေတယ်။ အိမ်ထောင်ရေးက ကိုယ်နဲ့ မဆိုင်သလို ဆိုပေမယ့် တချိန်ကျရင် ဆိုင်လာတော့မှာမဟုတ်လား။ အချစ်ရေးနဲ့ အိမ်ထောင်ရေး က သက်ဆိုင်လား မသက်ဆိုင်ဘူးလားဆိုတာကို ခုထိ ကိုယ်လည်း ဇဝေဇဝါ ဖြစ်တုန်ုးပဲ။

 

 

 

 

 တကယ်တော့ ဒါတွေက ကိုယ်စိုက်ပျိုးခဲ့တဲ့ အပင်ကို ကိုယ် ရိတ်သိမ်းရတာပဲ မဟုတ်လား။