အခန်း ၁
နိဒါန်းဖွင့်တာကြာတဲ့ကိုယ့်အကျင့်အတိုင်း
အခန်း ၁ ဟာ အဖွင့်ကြာသွားတယ်။
ပြတင်းပေါက်က ကန့်လန့်ကာ ကို
ဆွဲဖွင့်လိုက်တိုင်း
ပင်လယ်ဟာ ကိုယ့်ကို နေရောင်နွေးနွေးနဲ့
နှုတ်ဆက်တယ် အချစ်ရေ
မင်းကိုရော မနက်အိပ်ရာထရင်
ဘယ်သူက ဘယ်လို နှုတ်ဆက်သလဲ
ကိုယ်မေးချင်တယ် အချစ်ရေ။
အခန်း ၂
မျက်စိမှတ်လိုက်တိုင်း
သူမ ပြုံးတာလေးပဲ မြင်နေတော့
မျက်စိ ပါဝါစစ်ဖို့ လိုလာပြီလို့
တွေးရင်း ကိုယ့်ဟာကိုယ်ပြုံးမိတယ်။
အခန်း ၃
ပင်လယ်ရေ ဘယ်သူသောက်သောက်
မကုန်ပါဘူးကွာ ဆိုတာ ပြောတာ
ကြားဖူးတယ်။
ကိုယ့်အချစ်တွေကတော့
မင်းသောက်လို့ ကုန်ပြီ အချစ်ရေ
အခန်း ၄
တခါတလေ ပင်လယ်ကိုကြည့်မိရင်း
လင်းပိုင်လေး တကောင်လောက် တွေ့ရင်
ဖမ်းပြီး မင်းကို လက်ဆောင်ပေးဖို့
ကိုယ် တွေးမိတယ် အချစ်ရယ်။
အခန်း ၅
ဓါတ်ပုံတွေဟာ အသက်ရှိတယ်
အချစ်ရေ။
မယုံမရှိနဲ့
ညအိပ်တိုင်း မင်းဓါတ်ပုံတွေ
ဘေးနားထားအိပ်ရင်
မင်း ဟောက်နေတဲ့အသံကို
ကိုယ်အတိုင်းသားကြားရတယ်။
အခန်း ၆
ဒီအခန်းထဲမှာ
အလွမ်းတွေနဲ့ပြည့်နေပါရောလား
ပင်လယ်အော်သံဟာ
ဆွေးမြေ့မြေ့ တယောသံအတိုင်း
နောက်ခံတီးလုံး တီးပေးနေတယ်
ဘယ်ညာယိမ်းတဲ့ လှိုင်းတွေအတိုင်း
စိတ်တွေကလည်း တောင်ရောက် မြောက်ရောက်
မနက်မိုးလင်းလို့ ပြတင်းပေါက်ဖွင့်လိုက်တိုင်း
မင်းအသံကြားရမလား စိတ်ကူးယဉ်မိတယ်
အချစ်ရယ်။ ။
Comments
Post a Comment