တ နဲ့ တစ်
အခုနောက်ပိုင်း ရှုတ်ထွေးလာတဲ့ပြဿနာတစ်ခုက 'တ'နဲ့ 'တစ်'ပြဿနာဖြစ်ပါတယ်။'တ'ရေးမလား 'တစ်'ရေးမလား၊ ဇဝေဇဝါဖြစ်နေတတ်ပါတယ်။အကြမ်းဖျင်းအားဖြင့်တော့ ကိန်းဂဏန်းလို့အဓိပ္ပါယ်ရရင် 'တစ်'လို့ ရေးပါတယ်။ဒီလိုမှမဟုတ်ဘဲ စကားအစပ်အဆက်အနေနဲ့ စကားလုံးဖြစ်အောင်သုံးတဲ့အခါ 'တ'လို့ ရေးပါတယ်။
"သူ တငိုငို တရယ်ရယ်ဖြစ်နေတယ်"လို့ဆိုရင် 'တ' ပါ။'တစ်'နဲ့မဆိုင်ပါဘူး။'တစ်ရံရောအခါ'၊
"တစ်ခါတုန်းက" ဆိုရင်တော့တစ်ခါ၊နှစ်ခါ၊ သုံးလေးခါအရေအတွက်ဖြစ်တဲ့အတွက် "တစ်"လို့ မှတ်ရပါမယ်။ တစ်ခါ တစ်ခါ တချို့ကိစ္စတွေက အရေအတွက်ဟုတ်သလား၊မဟုတ်သလားမပြောနိုင်တဲ့အခါ
၊အူကြောင်ကြောင်စကားလုံးတွေ တွေ့တဲ့အခါမှာ ဘာလုပ်ရမှန်းမသိ ဖြစ်တတ်ပါတယ်။"တစ်ခါတလေ"ဆိုတဲ့စကားမှာ "တစ်ခါ"မှာကျတော့ "စ"သတ်တယ်၊ 'တလေ'မှာကျတော့ "စမသတ်"ပါဘူး။ဘယ့်နှယ်လုပ်မလဲဆိုတော့ ကျွန်တော်လဲ မတတ်နိုင်ပါဘူး။ဆရာကြီးမင်းသုဝဏ်ရဲ့ 'လူလည်းတစ်ထွေ ရေလည်းတခြား'ဆိုတဲ့ဆောင်းပါးကို ပြဋ္ဌာန်းဖို့ ခေါင်းစဥ်တပ်တဲ့အခါ ပြဿနာတွေ့ပါတယ်။'လူလည်းတစ်ထွေ'ဆိုတော့ 'တစ်'လို့ ရေးရပါတယ်။'ရေလည်းတခြား'ကျတော့ 'တခြား'လို့ ရေးရပါတယ်။အဲဒီတော့ ခေါင်းစဥ်တစ်ခုတည်းမှာ."လူလည်းတစ်ထွေ ရေလည်းတခြား ဖြစ်သွားပါတယ်။
အဲဒီလို ဇဝေဇဝါဖြစ်လောက်တဲ့ သတ်ပုံတွေကိုလည်း သတိထားပြီးမှတ်သားဖို့ လိုပါတယ်။'တစ်'ဆိုတာ ကိန်းဂဏန်းအရေအတွက် 'တစ်'လို့ပြောတဲ့အခါမှာ 'စသတ်'ပြီးရေးပါတယ်။နေရာတိုင်းမှာ 'စသတ်'တာမဟုတ်ပါဘူး။ဒါကိုမကွဲပြားတဲ့အတွက် စာရေးတဲ့အခါမှာ 'အတူတစ်ကွ'တို့ 'အများတစ်ကာ'တို့ ဖြစ်ကုန်ကြပါတယ်။'ကျွန်တော်နဲ့သူနဲ့ အတူတစ်ကွလာကြတယ်'တို့ 'အများတစ်ကာ ပရိသတ်အပေါင်းတို့'ဆိုပြီး 'တစ်' တွေ ဗြောင်းဆန်ကုန်ပါတယ်။
ဘယ်လောက်အထိ အခြေအနေ ဆိုးရွားသွားသလဲဆိုရင် ပါဠိဘာသာမှာ 'တဒင်္ဂပဟာန်' ဆိုတာရှိပါတယ်။ဒါမြန်မာစကားမဟုတ်ပါဘူး။ပါဠိစကားပါ။'တ'ကလည်း ပါဠိစကားပါ။အဲဒါကို ရောထွေးပြီး'စသတ်'နဲ့ 'တစ်ဒင်္ဂပဟာန်'ဖြစ်ကုန်ပါတယ်။
တစ်ခါကလည်း မြန်မာစာအဖွဲ့က တာဝန်ရှိသူတစ်ယောက် ကိုယ်တိုင်ကြုံတွေ့ခဲ့ရတဲ့အဖြစ်အပျက်လေးတစ်ခု ကြားဖူးပါတယ်။မှတ်ပုံတင်ပျောက်သွားလို့ လ.ဝ.က ရုံးသွားတော့ စာရေးကထိုင်ပါဆိုပြီး ဖောင်ဖြည့်ပေးတယ်။သူကတော့ ဘေးကထိုင်ပြီးကြည့်နေတာပေါ့။ကိုယ်တွင်ထင်ရှားသောအမှတ်အသားဆိုတော့ စာရေးက ဘယ်လိုဖြည့်သလဲဆိုရင်
"တစ်တောင်ဆစ်တွင် မှည့်တစ်လုံးရှိသည်"လို့ ရေးတယ်။'တံတောင်ဆစ်'လည်း"တစ်" ရိသမျှအကုန် လျှောက်ပြီး'တစ်'တော့တာပါပဲ။ဒါကြောင့် ရှိသမျှတွေအကုန်လိုက်ပြီးမ 'တစ်'ပါနဲ့။ဇဝေဇဝါဖြစ်နေရင်
သတ်ပုံကျမ်း လှန်ကြည့်လိုက်ပါ။ဒီနေ့သတ်ပုံမှားတဲ့ကိစ္စတွေမှာ သတ်ပုံကျမ်းမကြည့်တာတွေလည်း ပါပါတယ်။
{ဆရာကြီးမောင်ခင်မင်(ဓနုဖြူ)ရုံးသုံးမြန်မာစာရေးသားနည်း}
Comments
Post a Comment